काठमाडौँ- सरकारले इरानमाथि भएको आक्रमणका कारण नेपाल लगायत विभिन्न मुलुकमा अलपत्र परेका नेपालीको सुरक्षा र उद्धारका लागि सहजीकरण गर्ने निर्णय गरेको छ ।
मन्त्रिपरिषदको आज बसेको बैठकले अशान्तिका कारण उडान रद्ध भई त्रिभुवन विमानस्थल लगायत विभिन्न अन्तर्राष्ट्रिय विमानस्थलमा ट्रान्जिटका क्रममा अलपत्र परेका यात्रुहरुको उचित सुरक्षासहित होल्ड हुने व्यवस्था गर्ने निर्णय गरेको हो ।
उडान नहुने अवस्थाका कारण त्यस्ता यात्रुहरुलाई सुरक्षासहित बसोबासको व्यवस्था गर्न सम्वद्ध मुलुकका दूतावास तथा नियोगलाई निर्देशन दिने निर्णय सरकारले गरेको परराष्ट्रमन्त्री बालानन्द शर्माले जानकारी दिनुभयो ।
अन्तर्राष्ट्रिय हवाई उडानहरु हाल अवरुद्ध भएकाले सम्वन्धित मुलुकमै सुरक्षा सहित बस्ने प्रबन्ध मिलाउने निर्णय सरकारले गरेको परराष्ट्रमन्त्री शर्माले बताउनुभयो ।
नेपालको विमानस्थलमा रोकिएका यात्रुहरुको व्यवस्था गर्ने र सम्वन्धित द्वन्द्वग्रस्त मुलुकमा नजान र आवश्यक सुरक्षा सावधानी अपनाउन ट्राभल एडभाईजरी स जारी गरी आग्रह गरिएको उहाँले जानकारी दिनुभयो ।
इरानमाथि इजरायल र अमेरिकाले संयुक्त रुपमा आक्रमण गरिएपछि इरानले मध्यपूर्वसहित खाडीमुलुकमा प्रत्याक्रमण गरेको छ । यसका कारण खाडी मुलुकमा रहेका नेपालीको सुरक्षा चिन्ता बढेको छ ।।
