रुपन्देही– प्रतिनिधि सभा सदस्य निर्वाचनको मिति नजिकिदै गर्दा दल तथा तिनका उम्मेदवारहरु आन्तरिक प्रचार प्रसारमा जुटेका छन् । फागुन २१ गते हुने निर्वाचनलाई आफ्नो पक्षमा पार्न दलका उम्मेदवार तथा स्वतन्त्र उम्मेदवारहरु बिभिन्न रणनीति बनाएर चुनावी मैदानमा होकिएका छन् ।
निर्वाचन नजिकदै गर्दा दल तथा उम्मेदवारले आंचार संहिता उल्लघन गर्न सक्ने भन्दै मुख्य निर्वाचन अधिकृतको कार्यालयले निर्बाचन आचारसंहिता वारे उम्मेदवार तथा सरोकारवालालाई सचेत बनाएको छ ।कार्यालयले सर्वपक्षीय तथा सर्वदलीय अन्तरक्रिया गर्दै निर्बाचनका लागि जारी गरिएको निर्बाचन आचारसंहिताको पूर्ण रुपमा पालना गर्न आग्रह गरेको छ ।
रुपन्देहीका प्रमुख निर्बाचन अधिकृत तथा निर्बाचन आचार संहिता अनुगमन समितिका संयोजक अशोककुमार बस्नेतले आयोगले जारी गरेको निर्बाचन आचारसंहिता सवैले पालना गर्नु पपर्नेमा जोड दिनुभयो । उहाँले राजनीतिक दल, उम्मेदवार सहित सरोकारवाला सवै निकायले आचार संहिता पालना गर्दै निर्वाचनलाई स्वच्छ र भएरहित बनाउन आग्रह गर्नुभयो ।‘पालना नगरिएमा उम्मेदवारी नै खारेज हुनेसम्मको दण्ड जरिवानाको प्राबधान छ’ मुख्य निर्वाचन अधिकृत बस्नेतले भन्नुभयो, ‘निर्बाचनलाई भड्किलो र खर्चिलो नबनाऔं ।’
कार्यक्रममा सहभागि उम्मेदवार तथा उम्मेदवारका प्रतिनिधि सवैले आचारसंहिता पूर्ण रुपमा पालना गर्ने वारे सहमती जनाउनु भएको छ ।
रुपन्देही क्षेत्र नम्बर ३ का एमाले उम्मेदवार बासुदेव घिमिरेले निर्बाचन आचारसंहिता पूर्णरुपमा कार्यान्वयन गर्न कतिपय व्यवहारिक कठिनाइ भएपनि निर्बाचनलाई स्वच्छ, भयरहित र कम खर्चिलो बनाउनका लागि आफु लाग्ने प्रतिबद्धता जनाउनु भयो ।
उहाँले आचारसंहिताले निर्दिष्ट गरेका कुरा महत्वपूर्ण रहेको उल्लेख गर्दै निर्बाचन आचारसंहिताको पूर्णरुपमा कार्यान्वयन गर्न प्रतिबद्ध रहेको बताउनु भयो । नागरिक उन्मुक्ति पार्टि नेपालका उम्मेदवार नन्दकुमारी थापाले आचार संहिता सबैले पालना गर्नु पर्नेमा जोड दिनुभयो । उहाँले कतिपय दल र तीनका उम्मेदवारहरुले आचार संहिता उल्लघन गर्ने गरेकाले अनुगमनलाई प्रभावकारी बनाउन आग्रह गर्नुभयो ।
कार्यक्रममा सहभागी अधिकांश उम्मेदवार तथा राजनीतिक दलका प्रतिनिधिले बिगतका निर्बाचनमा आचारसंहिताको पूर्ण रुपमा पालना हुन नसकेको र नियमन गर्ने निकायले पनि प्रभावकारी भूमिका निभाउन नसकेको भन्दै यस पटक खरो रुपमा उत्रिन आग्रह गरेका छन् ।
रुपन्देही–३ का स्वतन्त्र उम्मेदवार गोपाल भण्डारीले पूरा गर्न नसक्ने खालका चुनाबी घोषणापत्रमाथिपनि निर्बाचन आचारसंहिताको दृष्टिले अनुगमन गरि कारवाहीको दायरामा ल्याउनु पर्ने बताउनु भयो । ‘जनतालाई दिग्भ्रमित गराउने र पूरा नै हुन नसक्ने खालका चुनावी घोषणापत्र तथा चुनावी मुद्धा लिएर मतदाता समक्ष जानेमाथि पनि कडा निगरानी हुनु पर्छ, उहाँले भन्नुभयो ।
रुपन्देहीका प्रमुख जिल्ला अधिकारी माधवप्रसाद पोखरेलले रुपन्देहीमा निर्वाचनका लागि आबश्यक शान्ति शुरक्षाको पुर्ण प्रत्याभुति रहेको बताउनु भयो । उहाँले ढुक्क भएर मतदान गर्न सकिने सुरक्षाको बातावरण तयार पारिएको उल्लेख गर्दै नागरिकलाई निर्वाचनबारे जागरुक बनाउन आग्रह गर्नुभयो ।
स्थानिय जानकारहरु मोतिप्रसाद सुवेदीले आयोगले जारी गरेको आचार संहितलाई पुर्ण रुपमा कार्यन्वयन गराउनु पर्नेमा जोड दिनुभयो । उहाँले निर्वाचनमा स्वच्छ रुपमा प्रतिनिधि छनौट गर्न पाउनु नागरिकको मौलिक अधिकार भएकाले कसैको प्रलोभनमा पर्न नहुने बताउनु भयो ।
