मकवानपुर- राष्ट्रियसभा सदस्य निर्वाचनमा बागमती प्रदेशबाट काँग्रेस-एमाले गठबन्धनका उम्मेदवारहरू निर्वाचित भएका छन् ।
महिलातर्फ नेपाली काँग्रेसकी गीता देवकोटा र अन्य समूहबाट नेकपा एमालेका प्रेमप्रसाद दंगाल निर्वाचित भएका हुनुभएको हो ।
महिलातर्फ निर्वाचित देवकोटाले प्रदेश सभातर्फ ६० मतसहित ३ हजार १८० मतभार प्राप्त गर्नुभयो भने स्थानीय तहतर्फ १६१ मतसहित ३ हजार ०५९ मतभार पाउनुभयो ।
उहाँले कुल ६ हजार २ सय ३९ मतभार प्राप्त गर्नुभएको निर्वाचन अधिकृत गीता श्रेष्ठले जानकारी दिनुभयो ।
त्यसैगरी अन्य समूहबाट निर्वाचित दंगालले प्रदेश सभातर्फ ५९ मतसहित ३ हजार १ सय २७ मतभार प्राप्त गर्नुभयो । स्थानीय तहतर्फ १ सय ६२ मतसहित ३ हजार ०७८ मतभार पाउँदै उहाँले कुल ६ हजार २०५ मतभार हासिल गर्नुभएको छ ।
महिलातर्फ नेकपाकी उम्मेदवार सरोजकुमारी झाले २ हजार ५ सय २२ मतभार प्राप्त गर्नुभयो भने नेमकिपाकी कविता महर्जनले १ सय ९७ मतभार पाउनुभया । अन्य समूहमा नेकपाका प्रेमप्रसाद सापकोटाले २ हजार ५ सय ४१ मतभार प्राप्त गर्नुभयो भने नेमकिपाका विक्रम ढुकुक्षुले १ सय ९७ मतभार पाउनुभयो । निर्वाचनमा प्रदेश सभातर्फ ३ र स्थानीयतह तर्फ ४ मत बदर भएको निर्वाचन अधिकृत श्रेष्ठले बताउनुभयो ।
निर्वाचनमा बागमती प्रदेशसभाका ८९ जना प्रदेशसभा सदस्य र स्थानीय तहका २ सय २९ जना प्रमुख तथा उपप्रमुख गरी कुल ३ सय १८ जनाले मतदानमा सहभागिता जनाएका थिए ।
प्रदेश सभातर्फ ४ हजार ७ सय १७ मतभार र स्थानीय तहतर्फ ४ हजार ३ सय ५१ मतभार खसेको थियो । कुल ९ हजार ०६८ मतभार खसेको निर्वाचन कार्यालयले जनाएको छ ।
हेटौंडा उपमहानगरपालिका–४ स्थित भुटनदेवी माध्यमिक विद्यालयमा बिहान ९ बजेदेखि दिउँसो ३ बजेसम्म मतदान भएको थियो । निर्वाचनमा २० जना मतदाता अनुपस्थित रहे ।
अनुपस्थितमध्ये १५ जना प्रदेशसभा सदस्य र ५ जना स्थानीय तहका प्रमुख तथा उपप्रमुख रहेका छन् । राप्रपा र हाम्रो नेपाली पार्टीका प्रदेशसभा सदस्यहरूले मतदान प्रक्रियामा सहभागिता जनाएनन् ।
नेकपाकी रमा आले मगर स्वास्थ्य उपचारका सिलसिलामा भारतमा रहेकाले मतदान गर्न आउन सक्नुभएन । स्थानीय तहतर्फ दुधौली नगरपालिकाका प्रमुख दिनेश अधिकारी, दोलखा बिगु गाउँपालिकाका अध्यक्ष सञ्जिव वली शंखरापुर नगरपालिकाका प्रमुख रमेश नापित, ललितपुर महानगरपालिकाकी उपप्रमुख मुना अधिकारी र सिन्धुपाल्चोक हेलम्बु गाउँपालिकाकी अध्यक्ष अप्सरा लम्साल अनुपस्थित रहेका थिए ।
यसैबीच, इच्छाकामना गाउँपालिकाकी उपप्रमुख माया सिलवाल काजकिरियामै रहेर पनि मतदानमा सहभागी हुनुभएको छ ।
उहाँका श्रीमानको चार दिनअघि निधन भएको थियो । राष्ट्रियसभा निर्वाचन अन्तर्गत बागमती प्रदेशमा महिलातर्फ १ र अन्यतर्फ १ गरी दुई पदका लागि मतदान भएको हो ।।
