गोरखा- आँबुखैरेनी सडकखण्डमा आज दिउँसो यात्रुवाहक बस र बलेरो जीप एक आपसमा ठोक्किएर दुर्घटना हुँदा ६ जना घाइते भएका छन् ।
गोरखा नगरपालिका-१३, स्थित पाँचकिलोमा सेराबाट आँबुखैरेनीतर्फ जाँदै गरेको ग २ ख ११४६ नम्बरको बस र विपरीत दिशाबाट आउँदै गरेको बाग्मती प्रदेश ०१–०२५ च ०७५८ नम्बरको बलेरो एकआपसमा ठोक्किएर दुर्घटना भएको हो ।
दुर्घटनामा परी घाइते हुनेहरुमा बलेरो चालक गोरखाको सहिद लखन गाउँपालिका–१, बक्राङका ३४ वर्षीय विवश विक, सोही स्थानका २७ वर्षीय शंकर विश्वकर्मा र १५ महिनाकी प्रभा विश्वकर्मा रहेको जिल्ला प्रहरी कार्यालय गोरखाका सूचना अधिकारी एवं प्रहरी नायव उपरीक्षक (डिएसपी) राजकुमार श्रेष्ठले जानकारी दिनुभयो ।
त्यसैगरी बसका चालक गोरखाको पालुङटार नगरपालिका–६ का ३० वर्षीय मिलन गुरुङ, गोरखा नगरपालिका–१३, देउरालीका ४२ वर्षीय कृष्णराम नराल र पालुङटार नगरपालिका–९ का ६५ वर्षीय होमबहादुर बानियाँ पनि घाइते भएका छन् ।
घाइते सबैलाई उपचारका लागि तत्काल उद्धार गरी आँबुखैरेनी अस्पताल, तनहुँमा लगिएको छ।
डिएसपी श्रेष्ठका अनुसार बलेरो चालक विवश विकको छातीमा भित्री चोट लागेको छ । अन्य घाइतेहरुको अवस्था मध्यम रहेको छ । घटनाको थप अनुसन्धान भइरहेको प्रहरीले जनाएको छ ।।
