सुनसरी- जिल्ला प्रशासन कार्यालय सुनसरीले आज राति ९ बजेदेखि अर्को सूचना जारी नभएसम्म स्थानीय प्रशासन ऐन, २०२८ को दफा ६(क) बमोजिम कर्फ्यु लागू गरिएको हो।
जसअनुसार कर्फ्यु आदेश पूर्वतर्फ इनरुवा नगरपालिका–३ र ६ को सीमास्थित महेन्द्र राजमार्गअन्तर्गत घोपाली टोलदेखि पश्चिमतर्फ कोशी ब्यारेजको पुलसम्म तथा उत्तर र दक्षिणतर्फ महेन्द्र राजमार्गबाट दुवैतर्फ २०० मिटर क्षेत्रभित्र लागू हुनेछ।
उक्त क्षेत्रमा कर्फ्यु अवधिभर कुनै पनि व्यक्तिलाई आवतजावत गर्न, मेला, जुलुस, प्रदर्शन, सभा, बैठक वा कुनै पनि प्रकारको जमघट गर्न निषेध गरिएको छ।
जिल्ला प्रशासन कार्यालयले कर्फ्यु आदेशको उल्लंघन गर्ने व्यक्तिलाई प्रचलित कानुनबमोजिम एक हजार रुपैयाँसम्म जरिवाना वा एक महिनासम्म कैद सजाय हुन सक्ने चेतावनी दिएको छ।
प्रशासनले जिल्लाको सुरक्षा अवस्था र शान्ति-सुव्यवस्था कायम राख्न सर्वसाधारणलाई कर्फ्यु आदेशको पूर्ण पालना गर्न आग्रह गरेको छ।।
