रौतहट-रौतहटको दुर्गाभगवती गाउँपालिका–३ स्थित मत्सरी घाटमा बागमती नदीको बीचमा फसेका १४ जना स्थानीय लाई सशस्त्र प्रहरी बल नेपालले सकुशल उद्धार गरेको छ।
शनिबार अपराह्न करिब ३:४० बजे मकैको दाल टिपेर नदी पार गर्दै घर फर्किने क्रममा अचानक बागमती नदीमा पानीको बहाव बढेपछि ११ जना महिला र ३ जना बालिका गरी १४ जना नदीको बीचमा रहेको टापुमा फसेका थिए।
घटनाको जानकारी प्राप्त हुनासाथ सशस्त्र प्रहरी बल नेपाल ११ नम्बर गण मुख्यालय रौतहट तथा मातहतका कार्यालयबाट सशस्त्र प्रहरी निरीक्षक यज्ञबहादुर योञ्जनको कमाण्डमा डीएम (डिजास्टर म्यानेजमेन्ट) टोलीसहित १७ जना सुरक्षाकर्मी र रबर बोटसहितको उद्धार टोली घटनास्थलमा परिचालन गरिएको थियो।
उद्धार टोलीले साँझ करिब ५ बजे रबर बोटमार्फत सबै १४ जनाको सकुशल उद्धार गरी आ–आफ्नो घरतर्फ सुरक्षित पठाएको सशस्त्र प्रहरीले जनाएको छ।
वर्षायाम सुरु भएसँगै नदी तथा खोलामा पानीको बहाव एक्कासि बढ्न सक्ने भएकाले आवश्यक सतर्कता अपनाउन सशस्त्र प्रहरीले समेत सर्वसाधारणलाई आग्रह गरेको छ।
