काठमाडौं -“तेन्जिङ नोर्गे शेर्पा ओपन लिड क्लाइम्बिङ प्रतियोगिता” को तेस्रो संस्करण आगामी जेठ १४ र १५ गते काठमाडौंमा आयोजना हुने भएको छ ।
नेपाल राष्ट्रिय पर्वतारोहण पथप्रदर्शक संघ र यूएस नेपाल क्लाइम्बर्स एसोसिएसन को संयुक्त आयोजनामा हुने प्रतियोगितामा नेपाली तथा विदेशी आरोहीहरूको सहभागिता रहनेछ ।
प्रतियोगितामा पुरुष तथा महिला विधामा छुट्टाछुट्टै प्रतिस्पर्धा हुनेछ । विजेताहरूले क्रमशः ५० हजार, ३० हजार र २० हजार रुपैयाँ नगद पुरस्कार प्राप्त गर्ने आयोजकले जनाएको छ ।
आयोजकका अनुसार यस वर्ष पहिलो पटक लिड क्लाइम्बिङ विधामा प्रतियोगिता हुन लागेको हो । यसअघि प्रतियोगिता टप–रोप क्लाइम्बिङमा मात्र सीमित थियो ।
नेपाल राष्ट्रिय पर्वतारोहण पथप्रदर्शक संघका अध्यक्ष तुल सिङ गुरुङका अनुसार हालसम्म २२ पुरुष र १० महिला आरोहीले नाम दर्ता गराइसकेका छन् । यस वर्ष करिब ४० पुरुष र १५ महिला सहभागी हुने अपेक्षा गरिएको छ ।
प्रतियोगिता तेन्जिङ नोर्गे शेर्पा र सर एड्मण्ड हिलारीले सन् १९५३ मे २९ मा सगरमाथाको पहिलो सफल आरोहण गरेको ऐतिहासिक सम्झनामा आयोजना गर्न लागिएको आयोजकले जनाएको छ ।
