काठमाडौँ- शिक्षा मन्त्री सस्मित पोखरेलले किर्तिपुरस्थित त्रिवि अन्तर्राष्ट्रिय क्रिकेट मैदान नहट्ने स्पष्ट पार्नु भएको छ ।
सरकारका प्रवक्तासमेत रहनुभएका मन्त्री पोखरेलले आज मन्त्रिपरिषदको बैठकका निर्णयहरु सुनाउने क्रममा त्रिवि क्रिकेट मैदानको विषयमा सञ्चारकर्मीहरुले जिज्ञाशा राख्दा मैदान खाली गर्ने सरकारको कुनै उद्देश्य नभएको प्रष्ट पार्नुभएको हो ।
उहाँले क्रिकेट मैदान खाली गर्ने सूचना त्रिविले जारीगरेसँगै यस विषयमा त्रिभुवन विश्वविद्यालयका उपकुलपतिसँग बैठक राखेर कुरा भएको पनि उल्लेख गर्नुभयो ।
त्रिवि क्रिकेट मैदान खाली गराउने त्यस्तो कुनै उद्देश्य नभएको तर भाडाको सम्झौता सकिएको हुनाले त्यसलाई फेरि नयाँ ढङ्गले सम्झौता गर्ने तयारी भइरहेको पनि मन्त्री पोखरेलले बताउनुभयो ।
त्रिविको अतिक्रमित जग्गा खाली गराउने निर्णयसँगै विश्वविद्यालयले किर्तिपुरस्थित त्रिवि क्रिकेट मैदान खाली गराउन पत्राचार गरेको थियो । अन्तर्राष्ट्रिय स्तरको क्रिकेट खेल मैदानको रुपमा विकास गरिएको यो रंगशालामा धेरै राष्ट्रिय तथा अन्तर्राष्ट्रिय खेलहरु भइसकेका छन ।
खेल मैदानलाई आधुनिक र व्यवस्थित बनाउँदै जाने क्रममा फ्लड लाइटमा पछिल्लो नेपाल प्रिमियर लिग (एनपिएल) समेत यो मैदानमा भएको थियो ।।
