सिरहा-आसन्न प्रतिनिधिसभा सदस्य निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गराउने उद्देश्यले सिरहा जिल्लामा ६ सय ५० जना नेपाली सेनाको परिचालन गरिएको छ ।
एकीकृत सुरक्षा योजना–२०८२ अनुसार जिल्लाभर निर्वाचन सुरक्षालाई सुदृढ बनाउन नेपाली सेना परिचालन गरिएको हो । निर्वाचन नजिकिँदै जाँदा सुरक्षा व्यवस्थालाई थप प्रभावकारी बनाउने लक्ष्यसहित सेना, नेपाल प्रहरी, सशस्त्र प्रहरी बल नेपाल तथा राष्ट्रिय अनुसन्धान विभागबीच समन्वय बढाइएको जनाइएको छ ।
सुरक्षा योजनाअनुसार नेपाली सेना सिरहाका सबै निर्वाचन क्षेत्रमा बाहिरी सुरक्षा घेराको जिम्मेवारीमा रहनेछ । मतदानस्थलको भित्री घेराको सुरक्षा नेपाल प्रहरी र निर्वाचन प्रहरीले सम्हाल्नेछन् भने दोस्रो घेरामा सशस्त्र प्रहरी बल नेपाल परिचालित रहनेछ ।
नेपाली सेनाले आवश्यकताअनुसार संयुक्त गस्ती, संवेदनशील क्षेत्रको निगरानी तथा आकस्मिक प्रतिक्रिया टोलीका रूपमा भूमिका निर्वाह गर्नेछ । जिल्ला प्रशासन कार्यालय सिरहाका अनुसार निर्वाचनलाई लक्षित गर्दै सुरक्षा निकायहरूले सम्भावित जोखिमको मूल्याङ्कन गरीरणनीतिक स्थानहरूमा सुरक्षा उपस्थिति बढाएका छन् । निर्वाचन अवधिभर मतपत्र छपाइ, ढुवानी, मतदानस्थलको सुरक्षा, मतपेटिका ढुवानी तथा मतगणनास्थलसम्मको सुरक्षामा विशेष ध्यान दिइनेछ ।
सिरहा जिल्लामा रहेका मतदानस्थलहरूलाई सामान्य, संवेदनशील र अतिसंवेदनशील गरी वर्गीकरण गरिएको छ । सोहीअनुसार सुरक्षा जनशक्ति परिचालन गरिएको प्रशासनले जनाएको छ । कुनै पनि अप्रिय घटना हुन नदिन उच्च सतर्कता अपनाइएको र आवश्यक परे तुरुन्त सुरक्षा टोली परिचालन हुने व्यवस्था मिलाइएको छ ।
सुरक्षा निकायहरूले निर्वाचनलाई सफल बनाउन आम नागरिक, राजनीतिक दल र उम्मेदवारसँग सहकार्य र समन्वयको अपिल गरेका छन् । स्थानीय प्रशासनले मतदातालाई निर्धक्क भई मतदान प्रक्रियामा सहभागी हुन आग्रह गर्दै निर्वाचनको सुरक्षामा कुनै कमी हुन नदिने प्रतिबद्धता व्यक्त गरेको छ
