धनगढी- सुदूरपश्चिमबाट राष्ट्रिय सभा सदस्यमा नेकपा एमालेका लीला कुमारी भण्डारी र नेपाली कांग्रेसका खम्मबहादुर खाती विजयी हुनुभएको छ ।
प्रदेश निर्वाचन कार्यालय धनगढीका प्रमुख प्रेमराज भट्टका अनुसार महिला तर्फ ३ हजार ९८४ मत प्राप्त गरेर भण्डारी विजयी भएकी हुन्। उहाका प्रतिद्वन्द्वी नेपाली कम्युनिष्ट पार्टीका राेजी बस्नेतले १ हजार ६ सय ७६ मत प्राप्त गर्नुभयो । यसैगरी, अन्यमा नेपाली कांग्रेसका खम्मबहादुर खाती विजयी हुनुभएको छ ।
उहाँले ३ हजार ९ सय ६९ मत प्राप्त गरे। उनका प्रतिद्वन्द्वी नेकपाका टिकाराम जैशीले १ हजार ८०५ मत पाउनुभयो । प्रदेश सभा सदस्य बराबर ५३ र पालिकाका प्रमुख, उपप्रमुख, अध्यक्ष र उपाध्यक्ष बरावर १९ मतभार रहेको छ। ४९ प्रदेश सभा सदस्य र १७१ पालिकाका प्रमुख, उपप्रमुख, अध्यक्ष, उपाध्यक्ष गरि २ सय २० जनाले मतदान गरेका थिए।
जम्मा मतदाता संख्या २ सय २४ रहेकोमा ४ मत खसेन। नेपाली कांग्रेसका प्रदेश सभा सदस्य प्रकाश देउवा, राप्रपाका प्रदेश सभा सदस्य खेमा विष्ट, धनपाका प्रमुख गोपाल हमाल र जोशिपुर गाउँपालिका उपाध्यक्ष रेखा कठरियाले मतदान गर्नुभएन ।
महिला तर्फ एक जना र अन्यमा एक जना गरि दुई सदस्यका लागि भइरहेको निर्वाचनमा ४ उम्मेदवार प्रतिस्पर्धामा थिए। नेपाली कांग्रेस र एमालेको गठबन्धन रहेको थियो।
