रामेछाप -रामेछापको दोरम्बा शैलुङ गाउँपालिका–३ लेखर्कका पहिरोपीडितहरू अझै त्रासमा बाँच्न बाध्य छन् । पहिरोले बस्ती नै जोखिममा परेपछि एक बर्ष अगाडि विस्थापित भएका परिवारहरू सुरक्षित र स्थायी बसोबासको व्यवस्था नहुँदा अन्योलमा परेका छन् । स्थानीयका अनुसार अहिले वर्षा हुनेबित्तिकै पुनः पहिरो आउन सक्ने डरले राति राम्रोसँग सुत्नसमेत सक्ने अवस्था छैन ।
एक बर्ष अगाडि गाउँमा आएको पहिरोका कारण लेखर्कका ६३ परिवार विस्थापित भएका थिए । तीमध्ये केही परिवार अहिले पनि गाउँमै आफन्त तथा छिमेकीको आश्रयमा बसिरहेका छन् भने केही परिवारलाई गाउँपालिकानजिकै निर्माण गरिएको अस्थायी जस्ताको टहरामा राखिएको छ । साँघुरा कोठा र सीमित सुविधाका कारण अस्थायी टहरामा बस्ने परिवारलाई दैनिक जीवनयापनमा समेत कठिनाइ भइरहेको ५६ बर्षकी पहिरो पिडित बिष्णु कुमारी पहरीले बताउनु भयो ।
पहिरोले घर तथा जग्गा क्षति पु¥याएपछि आफ्नै घरमा फर्किएर बस्ने अवस्था नरहेको ६४ बर्षकी पहिरो पीडित मैया पहरीले बताउनु भयो । उहाँ अहिले अस्थाइ रुपमा बनाइएको जस्ताको टहरोको एउटा कोठमामा २ छोरा र बुहारी सहित कष्टसंग् बसिरहनु भएको छ । लेखर्क गाउँमै रहेका परिवारसमेत सुरक्षित महसुस गर्न नसकेको र सामान्य वर्षा हुँदा पनि पहिरोको त्रासले सताउने गरेको उनीहरू बताउँछन् ।
अघिल्लो बर्ष गाउँमा आएको बिनासकारी पहिरोमा एकै परिवारका चार जनासहित १० जनाको मृत्यु भएको थियो । घटनापछि ठूलो जनधनको क्षति व्यहोरेको लेखर्कका बासिन्दा अहिले राहतभन्दा पनि दीर्घकालीन पुनस्र्थापनाको पर्खाइमा छन् । पहिरोपीडितहरूले सरकारले तत्काल सुरक्षित आवासको व्यवस्था गर्नुका साथै जोखिमयुक्त बस्तीलाई सुरक्षित स्थानमा स्थानान्तरण गरी स्थायी घर निर्माण गरिदिनुपर्ने माग गरेका छन् । उनीहरूले सडक, खानेपानी, विद्युत् तथा अन्य आधारभूत पूर्वाधारको समेत पुनर्निर्माण गर्न सरकारसँग आग्रह गरेका छन् ।
स्थानीयवासीका अनुसार अस्थायी टहरामा लामो समयसम्म बस्न सम्भव छैन । बालबालिका, वृद्धवृद्धा तथा महिलालाई साँघुरो टहरामा बस्न झनै समस्या भएको उनीहरूको भनाइ छ । त्यसैले सरकारले अस्थायी राहतको सट्टा स्थायी पुनस्र्थापनाको स्पष्ट योजना बनाएर काम अघि बढाउनुपर्ने पीडितहरूको माग छ । पहिरोको पीडा भोगेको लामो समय बितिसक्दा पनि त्रासपूर्ण अवस्थामा बस्नुपरेको भन्दै पीडितहरूले संघ, प्रदेश र स्थानीय तीनै तहका सरकारसँग समन्वय गरी स्थायी समाधान खोज्न आग्रह गरेका छन् । आफ्नो १० जनाको परिवार जस्ताको अस्थाइ कटेराको एउटा कोठामा बस्नु पर्दा साह्रै कठिनाइ भएको पिडित मेहरमान पहरीले बताउनु भयो ।
