तनहुँ- अर्थमन्त्री डा. स्वर्णिम वाग्लेले प्रधानमन्त्री बालेन्द्र शाह, पार्टी सभापति रवि लामिछानेसहित सम्बन्धित पक्षसँग परामर्श र छलफल गरेरै करका दर हेरफेर गरिएको बताउनुभएको छ ।
प्रधानमन्त्री, पार्टी सभापति लगायतसँग करिब आठ घण्टा घनिभूत छलफल गरेर बजेट तथा करका दरसम्बन्धी निर्णय गरिएको उहाँले स्पष्ट पार्नुभयो ।
जिल्ला समन्वय समिति तनहुँको आयोजनामा आर्थिक वर्ष २०८२/८३ मा जिल्लाभर सञ्चालित विकास निर्माण तथा सेवा प्रवाहको अवस्थाबारे आयोजित जिल्ला स्तरीय वार्षिक समीक्षा कार्यक्रममा बोल्दै अर्थमन्त्री वाग्लेले करका दर हेरफेर आफ्नो व्यक्तिगत निर्णय नभएको स्पष्ट पार्नुभयो ।
उहाँले पूर्वाधार, पर्यटन, शिक्षा लगायतका क्षेत्रमा लगानी विस्तार गरी रोजगारी सिर्जना गर्ने सरकारको लक्ष्य रहेको बताउनुभयो ।
अघिल्लो सरकारकै पालादेखि ठूलो आन्तरिक तथा बाह्य ऋणको दायित्व रहेकाले राज्यलाई आवश्यक स्रोत जुटाउन राजस्वका नयाँ आधार खोज्नुपर्ने अवस्था आएको उहाँको भनाइ थियो ।
अर्थमन्त्री वाग्लेले सरकार सुशासन र पारदर्शिताको पक्षमा निर्मम रूपमा अघि बढिरहेको दाबी गर्नुभयो ।
राज्यका स्रोतसाधनको प्रभावकारी उपयोग, विकास निर्माणमा परिणाममुखी काम र सेवा प्रवाहमा सुधारलाई सरकारले प्राथमिकतामा राखेको उहाँले बताउनुभयो ।
