सिरहा- सिरहामा कर्फ्यु उल्लङ्घन गर्दै प्रदर्शनमा निस्किएकाहरुमाथि प्रहरीले गोली चलाउँदा १ जनाको मृत्यु भएको छ ।
सिरहाको गोलबजारमा आगजनी तथा तोडफोडमा उत्रिएका प्रदर्शनकारीमाथि प्रहरीले चलाएको गोलीबाट गणेश यादवको मृत्यु भएको हो ।
प्रहरीको गोली लागेर मृत्यु २० बर्षीय यादव सिरहाको औरही गाउँपालिका वडा नं. २ तुलसीपुरका बासिन्दा हुन ।
प्रहरीको गोलीबाट अर्का एक जना घाइते भएका छन् । उनको पहिचान खुलेको छैन । घाइतेलाई थप उपचारको लागि विराटनगर लगिएको छ । ।
प्रदर्शनकारीहरुले गोलबजार क्षेत्रमा नाराबाजी गर्दै केही मोटरसाइकलमा आगजनी गर्नुको साथै घरमा तोडफोड गरेका थिए ।
अहिले गोलबजार क्षेत्र तनावग्रस्त बनेको छ ।
प्रहरी, सशस्त्र प्रहरी र नेपाली सेनाको बाक्लो उपस्थितिको बावजुद सिरहाको लहान, धनगढीमाई, कसहा, गोलबजार, सिरहा, नरहा लगायतका चोकहरुमा आन्दोलनकारीहरुले प्रदर्शन गरिरहेका छन ।
जिल्ला प्रशासन कार्यालय सिरहाले सिरहाको गोलबजार आसपासको क्षेत्रमा आज दिउँसो २.०० बजेदेखि अनिश्चितकालीन कर्फ्यु आदेश जारी गरिसकेको छ ।
सुनसरीको घटनाको सत्य तथ्य छानविन गरी दोषी उपर कानुनी कार्वाहीको माग गर्दै विगत केही दिनदेखि सिरहाका विभिन्न चोकहरुमा प्रदर्शन भइरहेको छ ।।
