सुर्खेत- कर्णाली प्रदेशका दुई पालिकामा अझैपनि फोर–जी (एलटीई) सेवाको पहुँच पुग्न सकेको छैन ।
नेपाल टेकिलमको सेवा विस्तारमा भइरहेको ढिलाइले फोर-जी सेवा लिन आतुर टेलिकमका उपभोक्तालाई थ्री-जीमै सीमित हुनुपर्ने बाध्यता छ ।
नेपाल टेलिकमले पनि डोल्पा जिल्लाको डोल्पो बुद्ध गाउँपालिका र शे फोक्सुन्डो गाउँपालिकामा फोर-जी सेवा विस्तार गर्न बाँकी रहेको जनाएको छ ।
टेलिकमको कर्णाली प्रादेशिक निर्देशनालयका निर्देशक निरन जोशीले दुर्गम भौगोलिक अवस्था र पूर्वाधार अभावले डोल्पाका दुई पालिकामा फोर–जी सेवा विस्तार गर्न ढिलाई भइरहेको बताउनु भयो ।
प्रदेशका ७९ वटै पालिकामा टु जी, थ्री जी सेवा सञ्चालनमा रहेको बताउँदै उहाँले हाल फोरजी सेवा पुग्न नसकेका डोल्पाका दुई पालिकामा छिट्टै सेवा विस्तार गरिने योजना रहेको जनाउनु भयो ।
फोर-जी सेवा नहुँदा डोल्पो क्याम्पस दुनैका क्याम्पस प्रमुख विष्णुलाल बुढा अनलाइन सेवा, डिजिटल कारोबार र शैक्षिक गतिविधिका लागि गाउँका नागरिकलाई सदरमुकाम धाउनुपर्ने बाध्यता रहेको बताउनुहुन्छ ।
शे फोक्सुन्डो गाउँपालिकाका उपाध्यक्ष पेम्मा वाङ्छेन गुरुङले इन्टरनेट अभावका कारण स्थानीय सरकारका काम–कारबाहीसमेत प्रभावित भएको बताउनु भयो ।
उहाँले इन्टरनेटको प्रभावकारी सेवा उपलब्ध नहुँदा स्थानीयको दैनिक जीवनसमेत प्रभावित बनेको जनाउनु भयो । उहाँका अनुसार माथिल्ला डोल्पामा कमजोर नेटवर्कका कारण सामान्य इन्टरनेट सेवा प्रयोग गर्नसमेत समस्या हुने गरेको छ ।
छिटो फोर–जी सेवा विस्तारका लागि जिल्ला, प्रदेश र संघीय तहमा समेत पटक-पटक पहल गरिएपनि कुनै सुनुवाइ हुन नसकेको उहाँको भनाइ थियो ।।
