काठमाडौँ- देशको पश्चिम तराई क्षेत्रमा अत्याधिक गर्मीसंगै तातो लहर लु को जोखिम रहेकाले जल तथा मौसम विज्ञान विभागले सतर्कता अपनाउन भनेको छ । विभागले लु सम्बन्धी विशेष बुलेटिन जारी गर्दै आवश्यक सावधानीका लागि सार्वजनिक अनुरोध गरेको हो ।
जारी बुलेटिनमा आगामी ३ दिन लुम्बिनी प्रदेश र सुदूरपश्चिम प्रदेशका पहाडी र तराई भू–भागका केही स्थानहरूमा अधिकतम तापक्रम ३८ डिग्री सेल्सियस वा सो भन्दा बढी रहने उल्लेख छ । तर केही स्थानहरूमा ४० डिग्री सेल्सियस वा सो भन्दा बढी भई अत्याधिक गर्मीको सम्भावना देखिएकाले आवश्यक तयारी र आवश्यक सतर्कता अपनाउन मौसम विभागले अनुरोध गरेको छ ।
विभागले विशेषगरी कञ्चनपुर, कैलाली, डोटी, बर्दिया, बाँके र दाङ जिल्लामा बढी सावधानी अपनाउन भनेको छ। साथै बैतडी, डडेलधुरा, अछाम, सुर्खेत, सल्यान, रोल्पा, प्युठान, पाल्पा, अर्घाखाँची, रुपन्देही र कपिलवस्तुका बासिन्दालाई पनि सतर्क रहन अनुरोध गरिएको छ।
विभागले नियमित रूपमा मौसमसम्बन्धी सूचना हेर्न र आधिकारिक बुलेटिनबाट अपडेट लिन पनि सबैलाई सुझाव समेत दिएको छ।
