धादिङ-भोटेकोशी बाढीबाट क्षतिग्रस्त भएपछि पुनर्निर्माण गरिएको धादिङको कृष्णभीर सडकखण्डमा पुनः पहिरो खस्न थालेको छ । लगातार दुई दिनदेखि परेको वर्षाका कारण कृष्णभीरमा माथिबाट पहिरो खस्न थालेको हो ।
पहिरोका कारण सडकको तलतर्फ निर्माण गरिएको सपोर्ट वालसमेत भासिएको छ । वर्षा निरन्तर भइरहेकाले सडकखण्ड थप जोखिममा परेको छ ।
यसैबीच, पृथ्वी राजमार्गका विभिन्न स्थानमा पहिरो खसेपछि राजमार्ग अवरुद्ध भएको छ । लगातारको वर्षाका कारण राजमार्गको ठाउँ–ठाउँमा पहिरो तथा गेग्रान खसेर सडक अवरुद्ध भएको हो ।
सडकमा पहिरो खस्ने क्रम जारी रहेकाले यातायात सञ्चालनमा समेत समस्या भएको छ । राजमार्ग खुलाउन सम्बन्धित निकायले पहिरो पन्छाउने तथा सडक मर्मतको काम अघि बढाउने तयारी गरेको छ ।
वर्षा अझै जारी रहेकाले कृष्णभीरलगायत पृथ्वी राजमार्गका जोखिमयुक्त सडकखण्डमा थप पहिरो खस्न सक्ने भएकाले यात्रु तथा सवारी चालकलाई सतर्कता अपनाउन आग्रह गरिएको छ ।
