काठमाडौं – रसुवाको भोटेकोसीमा गत भदौ १० गते आएको विनाशकारी बाढीपछि सम्पर्कविहीन भएका व्यक्तिहरूको खोजीका क्रममा माथिल्लो त्रिशूली–१ जलविद्युत् आयोजनाको अडिट–३ टनेलबाट ६ वटा शव फेला पारिएको छ।
आयोजनाका प्रतिनिधिसहितको संयुक्त उद्धार टोलीले टनेलभित्र खोजी गर्ने क्रममा ढलानका लागि बुनिएको डन्डीको जालीको भित्री भागमा अल्झिएको अवस्थामा शवहरू फेला पारेको हो।
उद्धार टोलीले ग्राइन्डर, ग्यास कटर र रोटरी रेस्क्यु उपकरण प्रयोग गरी जाली काटेर शवहरूलाई टनेलबाट बाहिर निकालेको जनाएको छ।
टनेलभित्र हिलोले छोपिएको अवस्थामा थप शवजस्तो आकृति देखिएपछि सोही क्षेत्रमा खोजी कार्य जारी राखिएको छ। उद्धार टोलीले टनेलभित्र थप व्यक्ति फसेको हुनसक्ने आशंकामा खोजीलाई निरन्तरता दिएको छ।
