कैलाली- सुदूरपश्चिम प्रदेशसभा सदस्य तथा पूर्व भौतिक पूर्वाधार विकासमन्त्री प्रकाशबहादुर देउवा पदमुक्त हुनुभएको छ ।
लगातार १० भन्दा बढी बैठकमा बिना सूचना अनुपस्थित भएपछि प्रदेशसभाका सभामुख भीमबहादुर भण्डारीले देउवालाई पदमुक्त गर्नुभएको हो ।
देउवा गत वर्ष भदौ २८ गते जेनजी आन्दोलनपछि व्यक्तिगत कामका लागि अमेरिका जानुभएको थियो।
स्वास्थ्यमा समस्या देखिएपछि उपचारका लागि गएका देउवा करिब ११ महिनासम्म नेपाल फर्किनुभएको छैन।
संविधानको धारा १८०(घ) अनुसार सभालाई सूचना नदिई लगातार १० बैठकमा अनुपस्थित भए प्रदेशसभा सदस्यको पद रिक्त हुने व्यवस्था छ।
देउवा छैटौँ अधिवेशनका २५ मध्ये ८ बैठकमा मात्र उपस्थित हुनुभएको र त्यसपछि सातौँ र आठौँ अधिवेशनका कुनै पनि बैठकमा अनुपस्थित हुनुहुन्थ्यो ।
पछिल्ला २७ बैठकमा उहाँको हाजिरी छैन।
सुदूरपश्चिम प्रदेशसभाको दोस्रो कार्यकालमा हालसम्म १२८ बैठक बसेकामा देउवा ६० बैठकमा मात्रै उपस्थित हुनुभएको थियो।
देउवाको पद रिक्त भएको जानकारी आगामी प्रदेशसभा बैठकमा सभामुखले गराउने तयारी छ।
देउवा कैलाली क्षेत्र नम्बर ५ (२) बाट निर्वाचित प्रदेशसभा सदस्यमा नेपाली काङ्ग्रेसको तर्फबाट विजयी हुनुभएको थियो ।।
