काठमाडौँ- सार्वजनिक सेवा प्रसारण नेपाल, नेपाल टेलिभिजन र कृषि सूचना तथा प्रशिक्षण केन्द्रबीच सहकार्य गर्ने गरी सम्झौता भएको छ । यी दुई संस्थाबीच कृषिसँग सम्बन्धित कार्यक्रम निर्माण तथा प्रसारण गर्ने विषयमा सम्झौता भएको हो ।
सार्वजनिक सेवा प्रसारण, नेपाल टेलिभिजनको कार्यालयमा भएको कार्यक्रममा सार्वजनिक सेवा प्रसारण नेपालका कामु प्रमुख प्रशासकीय अधिकृत आरती चटौत र कृषि सूचना तथा प्रशिक्षण केन्द्रका प्रमुख सवनम शिवाकोटीले सम्झौतापत्रमा हस्ताक्षर गर्नुभएको थियो ।
कार्यक्रममा सार्वजनिक सेवा प्रसारण नेपालका कार्यवाहक अध्यक्ष उर्वशी बस्न्यातले नेपाल टेलिभिजनसँग कृषि सूचना तथा प्रशिक्षण केन्द्रको लामो सहकार्य रहेको र यसलाई अझै दिगो र प्रभावकारी बनाउन आपसी समन्वय र सहकार्यलाई बलियो बनाउनुपर्ने बताउनु भयो ।
उहाँले कार्यक्रम निर्माण गर्दा गुणस्तर कायम गर्न पनि सुझाव दिनुभयो।
यसैगरी, सार्वजनिक सेवा प्रसारण नेपालका कामु प्रमुख प्रशासकीय अधिकृत आरती चटौतले कार्यक्रममार्फत कृषकलाई हेर्ने दृष्टिकोणमा परिवर्तन ल्याउन सकिने बताउनुभयो । उहाँले कार्यक्रममा सफलताको कथा समेट्न र प्रस्तुतिमा सुधार गर्न थप मेहनेत गर्ने उल्लेख गर्नुभयो ।
साथै, कृषि सूचना तथा प्रशिक्षण केन्द्रका प्रमुख शिवाकोटीले कृषि क्षेत्रका विविध गतिविधि समेटिएको कार्यक्रम प्रसारण गर्नेगरी सम्झौता गरिएपनि निरन्तर समन्वय र सहकार्यमा कार्यक्रम प्रभावकारी बनाउन आफुहरु प्रतिवद्ध रहेको उल्लेख गर्नुभयो ।
सम्झौता पत्रमा खासगरी कृषिसँग सम्बन्धित बिषयहरु बाली, पशुपालन, बागवानी, मत्स्य तथा खाद्य प्रविधि र कृषि कर्जा तथा बीमा जस्ता विषयमा निर्मित कार्यक्रम हप्ताको ६ दिन प्रसारण गरिने र एकदिन टेलिफिल्म प्रसारण गर्ने उल्लेख छ।
नेपाल टेलिभिजन र कृषि सूचना तथा प्रशिक्षण केन्द्रवीच विक्रम सम्बत् २०५५ सालदेखि निरन्तर सहकार्य हुँदै आएको छ ।।
