काभ्रेपलाञ्चोक- काभ्रेपलाञ्चोक साउन २४। काभ्रेपलाञ्चोकको भुम्लु गाउँपालिका-८ दोलालघाटस्थित दुलालेश्वर महादेव मन्दिर नजिकैबाट बुधबार साँझ सुनकोशी नदीमा बेपत्ता भएकी मण्डनदेउपुर नगरपालिका–७ निवासी ६७ वर्षीया तिलकुमारी पराजुलीको शव फेला परेको छ।
उनको शव ओखलढुंगाको सीमाक्षेत्रस्थित सुनकोशी नदीमा भेटिएको प्रहरीले जनाएको छ । ओखलढुंगाको सुनकोशी नदीकिनारामा शव फेला परेपछि पुष्टिका लागि परिवारमा फोटो पठाइएको थियो । पराजुलीको काटिएको कपाल र पिसाब थैलीको आधारमा शव पुष्टि भएको प्रहरीको भनाइ छ ।
तिलकुमारीसँगै नदीमा बेपत्ता भएका उनका ६८ वर्षीय श्रीमान् केदारनाथ पराजुलीको अवस्था भने अझै अज्ञात रहेको छ । प्रहरी, सशस्त्र प्रहरीको गोताखोर टोली र स्थानीयवासीले उनको निरन्तर खोजतलास गरिरहेका छन्।
प्रारम्भिक जानकारी अनुसार मृतक तिलकुमारी लामो समयदेखि बोनम्यारो क्यान्सरबाट पीडित थिइन ।केदारनाथले उनलाई पिठिउँमा बोकेर दोलालघाटसम्म पुऱ्याई नदीमा हाम फालेको प्रत्यक्षदर्शी र सीसीटीभी फुटेजका आधारमा खुलेको छ ।
प्रहरीले घटनाको थप अनुसन्धान गरिरहेको र बेपत्ता केदारनाथको खोजी कार्यलाई तीव्रता दिइएको जनाएको छ ।
