सिरहा- सिरहाको मिर्चैयामा आज सामाजिक सद्भाव र्याली निकालिएको छ । यसअघि सर्वदलीय बैठक बसी सद्भाव र्याली निकाल्ने सहमति भएको थियो ।
‘हिन्दु-मुस्लिम एक हौँ, बौद्ध, सिख-ईसाई आपस मे भाइ-भाइ’ नारासहित निस्केको सद्भाव र्यालीले मिर्चैयाको विभिन्न चोकको परिक्रमा गरेको थियो । सद्भाव र्यालीमा सबै समुदायको उपस्थिति थियो ।
सुनसरीमा घटेको घटनालाई लिएर सिरहाको गोलबजारमा विहीबार दुई पक्षबीच भीडन्तको अवस्था आएपछि स्थिति नियन्त्रणमा लिन प्रहरीले चलाएको गोलीबाट सिरहा औरही गाउँपालिका वडा नं. २ तुलसीपुरका गणेश यादवको मृत्यु भएको थियो भने धनुषाधाम घर भएका सुभाष ठाकुर घाइते भएका थिए । उनको उपचार भइरहेको छ ।
सिरहामा आज पनि गोलबजार र लहान नगरपालिका आसपासको क्षेत्रमा कर्फ्यु जारी छ ।
सिरहाको चोक चोकमा सुरक्षाकर्मीहरुको वाक्लो उपस्थिति रहेको छ ।
सडक, बजार पसलहरु सुनसान छन् ।।
