काठमाडौँ- प्रधानमन्त्री कार्यालयले हिंसा, उत्तेजना र भ्रामक सूचनाबाट प्रभावित नहुन तथा सामाजिक र धार्मिक सद्भाव कायम राख्न सबै राजनीतिक दल, नागरिक समाज, धार्मिक संघसंस्था, सञ्चारमाध्यम र सर्वसाधारणसँग अपिल गरेको छ।
कार्यालयले आज एक विज्ञप्ती जारी गर्दै सुनसरीको देवानगञ्जमा साउन १० गते भएको घटनाप्रति गम्भीर ध्यानाकर्षण भएको जनाएको छ। सरकारले घटनामा ज्यान गुमाएकाप्रति श्रद्धाञ्जली व्यक्त गर्दै घाइते र सुरक्षाकर्मीको शीघ्र स्वास्थ्य लाभको कामना गरेको छ।
सोमबार जारी प्रेस विज्ञप्तिमा घाइतेहरूको निःशुल्क उपचारको व्यवस्था मिलाइएको र घटनाको सत्यतथ्य छानबिन गरी भविष्यमा यस्ता घटना दोहोरिन नदिन आवश्यक सुझावसहित सात दिनभित्र प्रतिवेदन बुझाउने गरी गृह मन्त्रालयले छानबिन समिति गठन गरेको उल्लेख छ ।
साथै, सरकारले पीडित पक्षलाई उचित क्षतिपूर्ति उपलब्ध गराउने र दोषीउपर कडा कानुनी कारबाही गर्ने प्रतिबद्धता व्यक्त गरेको छ।।
