काठमाडौँ– भारत सरकारको आर्थिक सहयोगमा झापाको शिवसताक्षी नगरपालिका–६ स्थित श्री जन आदर्श माध्यमिक विद्यालयको नयाँ भवन निर्माणका लागि बुधवार शिलान्यास गरिएको छ।
विद्यालय भवनको संयुक्त रूपमा कोसी प्रदेश सभा सदस्य राधाकृष्ण खनाल, शिवसताक्षी नगरपालिकाका मेयर मेगाहाङ्ग थोप्रा तथा काठमाडौँस्थित भारतीय राजदूतावासकी द्वितीय सचिव गरिमा नौटियालले शिलान्यास गर्नुभएको हो।
भारतीय राजदूतावासका अनुसार करिब ३ करोड नेपाली रुपैयाँको लागतमा निर्माण हुने उक्त भवन भारत सरकारको आर्थिक सहयोगमा उच्च प्रभाव सामुदायिक विकास परियोजना अन्तर्गत निर्माण हुनेछ। परियोजना शिवसताक्षी नगरपालिकामार्फत कार्यान्वयन गरिनेछ।
शिलान्यास कार्यक्रममा मेयर थोप्रासहित स्थानीय सरोकारवालाले भारत सरकारले उपलब्ध गराउँदै आएको विकास सहयोगको प्रशंसा गर्नुभयो।
