एजेन्सी- रूसी पक्षले बिहीबार गरेको मिसाइल तथा ड्रोन आक्रमणका कारण किएभमा कम्तिमा आठ जनाको मृत्यु हुनुका साथै दर्जनौं घाइते भएको युक्रनी राष्ट्रपति भोलोदिमिर जेलेन्स्कीले बताउनुभएको छ । उहाँका अनुसार मस्कोले “ठूलो आक्रमण“ को तयारी गरिरहेको चेतावनी दिए पछि यो आक्रमण भएको थियो ।
युक्रेनको वायुसेनाले ब्यालेस्टिक मिसाइलहरू राजधानीतर्फ गइरहेको चेतावनी दिए पछि तथा जेलेन्स्कीले डब्लिनको भ्रमण छोटो पारेर पर्किए पछि उक्त आक्रमण भएको जनाइएको छ ।
मध्य र पूर्वी किएभमा एक दर्जन भन्दा बढी विस्फोटहरू भए पछि बासिन्दाहरू–केही बच्चाहरू र घरपालुवा जनावरहरूसँग–मेट्रो स्टेशनहरूमा आश्रय लिन हतार– हतार दौडि रहेको एएफपीले जनाएको छ ।
आक्रमणले आठ जनाको ज्यान लिएको पुष्टि गर्दै कम्तिमा २५ जना घाइते भएको सैन्य प्रशासनका प्रमुख तिमुर टाकाचेन्कोले बताउनुभएको छ । उहाँका अनुसार नागरिक तथा आवासीय क्षेत्रहरू लक्षित गरी आक्रमण गरिएको छ ।
क्षेत्रीय गभर्नर माइकोला कलास्निकका अनुसार आक्रमणमा किएभ क्षेत्रका पाँच जिल्लाहरू प्रभावित भएका छन् ।
“रातको समयमा, स्ट्राइक ड्रोन, ब्यालेस्टिक मिसाइल र क्रुज मिसाइलहरू प्रयोग गरेर किएभ क्षेत्रमा ठूलो आक्रमण गरेको कलास्निकले टेलिग्राम मार्फत बताउनु भएको छ ।
आपतकालीन कर्मचारीहरूले बुचा जिल्लाको गोदाम र एउटा घरमा आगो निभाउँदै गरेको उल्लेख गर्दै आक्रमणले यस क्षेत्रका घर, तथा छात्रावास र सवारी साधनहरू क्षति ग्रस्त भएको उहाँले बताउनु भएको छ ।
मध्य किएभमा हवाई–आक्रमण चेतावनीको क्रममा भएको विस्फोट पछि आकाशमा धुवाँ तथा आगोको मुस्लोसहितको बादल देखिएको जनाइएको छ ।
आक्रमणको लगभग ५० मिनेट पछि प्रारम्भिक प्रभाव स्थल नजिकै भएको दोस्रो विस्फोटले वायु मण्डलमा विषाक्त धुवा पठाएको थियो ।
युक्रेनी आपतकालीन सेवाहरूले सार्वजनिक गरेकोे तस्बिरहरूले आवासीय ब्लकमा व्यापक क्षति देखाएको छ ।
रुसले ठुलो आक्रमण गर्न लागेको गुप्तचर रिपोर्टका कारण उनी डब्लिनको भ्रमणबाट घर फर्किरहेको जेलेन्स्कीले बताउनु भएको छ ।
उहाँले पत्रकार सम्मेलनमा जनतालाई सावधान रहन आग्रह गर्दै आफ्ना बच्चाहरूलाई, तथा परिवारलाई सुरक्षित राख्न; आश्रयहरू प्रयोग गर्न र आक्रमणको चेतावनीहरूमा ध्यान दिन आवाह्न गर्नु भएको छ ।
उहाँले रूसी राष्ट्रपति भ्लादिमिर पुटिनले केही समय देखि युक्रेन विरुद्धको ठुलो आक्रमणको तयारी गरिरहेको“ खुलासा गर्नु भएको छ ।
यसैगरी युक्रेनले पनि पछिल्लो समयमा रूसी ऊर्जा पूर्वाधार र सैन्य लक्ष्यहरूलाई लक्षित गर्दै लामो दूरीको ड्रोन आक्रमणहरू पनि बढाएको जनाइएको छ ।
रूसी अधिकारीहरूले सीमावर्ती क्षेत्रहरूमा बारम्बार आक्रमण गरेको रिपोर्ट गरेका छन् भने मस्कोले युक्रेनबाट आएका सयौं ड्रोनहरू आफ्नो हवाई सुरक्षाले रोकेको बताएको छ ।
द्वन्द्व अन्त्य गर्ने अमेरिकी मध्यस्थता प्रयास अहिलेसम्म असफल भएको जनाइएको छ भने,रूसले युद्ध अन्त्य गर्न पूर्ण रूपमा अस्वीकार गरि रहेको जेलेन्स्कीले बताउनु भएको छ ।
यद्यपि सबै सम्भावित आधिकारिक र अनौपचारिक च्यानलहरू मार्फत युद्ध समाप्त गर्न सकिने आशाका सात युक्रेनमा बैठक र अर्थपूर्ण वार्ताका लागि तयारी गरिरहेको उहाँले बताउनु भएको छ ।।
