रौतहट – रौतहट प्रहरीले भारततर्फ अवैध रूपमा निकासी गर्न लागिएको करिब ९० लाख १६ हजार रुपैयाँ बराबरको फर्सीको बिउ बरामद गरेको छ ।
जिल्ला प्रहरी कार्यालय रौतहटका अनुसार बुधबार साँझ बौधीमाई नगरपालिका–७ बडा बंकुलस्थित नेपाल–भारत सीमा क्षेत्र नजिक त्रिपालले छोपी लुकाइछिपाइ राखिएको फर्सीको बिउ रहेको भन्ने गोप्य सूचनाका आधारमा नेपाल प्रहरी र सशस्त्र प्रहरीको संयुक्त टोलीले छापा मारेको थियो ।
खानतलासीका क्रममा ३२२ बोरा फर्सीको बिउ बरामद गरिएको प्रहरीले जनाएको छ। प्रति बोरा ४० किलो रहेको र दरले जम्मा १२ हजार ८८० किलो फर्सीको बिउको मूल्य करिब ९० लाख १६ हजार रुपैयाँ रहेको बताइएको छ। बरामद गरिएको बिउ आवश्यक कारबाहीका लागि भन्सार कार्यालयमा बुझाइएको प्रहरीले जनाएको छ ।
यसैबीच, बिउ नियन्त्रणमा लिने क्रममा केही स्थानीयवासीले अवरोध गर्दै ढुंगामुढा गरेपछि स्थिति तनावग्रस्त बनेको थियो। अवस्था नियन्त्रणमा लिन प्रहरीले ६ राउण्ड अश्रुग्यास प्रहार गरेको जनाएको छ ।
झडपका क्रममा ढुंगामुढामा संलग्न ३ जना स्थानीय तथा ३ जना प्रहरी कर्मचारी गरी ६ जना सामान्य घाइते भएका छन् ।
घटनाबारे थप अनुसन्धान भइरहेको जिल्ला प्रहरी कार्यालय रौतहटका सूचना अधिकारी प्रहरी नायव उपरीक्षक बसन्त गौतम ले जानकारी दिएका छन् ।
