काठमाडौं- राष्ट्रिय स्वतन्त्र पार्टीका सभापति रवि लामिछाने र भारतीय प्रधानमन्त्री नरेन्द्र मोदी बीच आज भेटवार्ता भएको छ। भेटपछि प्रधानमन्त्री मोदीले सामाजिक सञ्जालमार्फत नेपालसँगको सम्बन्धलाई थप सुदृढ बनाउन भारत प्रतिबद्ध रहेको सन्देश दिनुभएको छ।
प्रधानमन्त्री मोदीले राष्ट्रिय स्वतन्त्र पार्टीका सभापति लामिछानेसँग भेट गर्न पाउँदा खुशी लागेको उल्लेख गर्दै साझा समृद्ध भविष्यका लागि मिलेर काम गर्ने उहाँको इच्छालाई स्वागत तथा समर्थन गरेको बताउनुभएको छ।
मोदीले नेपाललाई भारतको ‘नेबरहुड फर्स्ट’ (छिमेकी पहिलो) नीतिअन्तर्गत प्राथमिक साझेदार राष्ट्रका रूपमा व्याख्या गर्दै नेपालसँगको सम्बन्धलाई थप उचाइमा पुर्याउन भारत इच्छुक रहेको उल्लेख गर्नुभएको छ।
“नेपाल हाम्रो ‘छिमेकी पहिलो’ नीतिअन्तर्गत प्राथमिक साझेदार हो। नेपालमा नयाँ सरकारसँग सहकार्य गर्दै दुई देशबीचको विशेष तथा बहुआयामिक सम्बन्धलाई अझ उच्च स्तरमा पुर्याउन हामी उत्सुक छौँ,” मोदीले सामाजिक सञ्जाल एक्समा लेख्नुभएको छ।
Delighted to meet the Chairman of the Rastriya Swatantra Party of Nepal Mr. Rabi Lamichhane. I welcome and fully share his desire to work closely together for a shared and prosperous future.
Nepal is a priority partner under our Neighbourhood First policy and we look forward to… pic.twitter.com/ZMjpGthKTX
— Narendra Modi (@narendramodi) June 3, 2026
लामिछाने भारतीय जनता पार्टीको निमन्त्रणामा भारत भ्रमणमा रहनुभएको छ। भ्रमणका क्रममा उहाँले भारतीय प्रधानमन्त्री मोदीसहित विभिन्न राजनीतिक नेतृत्वसँग भेटवार्ता गर्नुभएको छ।
नेपाल–भारत सम्बन्ध, आपसी हितका विषय तथा द्विपक्षीय सहकार्यका सम्भावनाबारे भेटमा छलफल भएको लामिछाने सचिवालयले जनाएको छ ।
