धुलिखेल, १३ जेठ :
अरनिको राजमार्ग अन्तर्गत काभ्रेपलाञ्चोकको धुलिखेल नगरपालिका-८ ठकुरीगाउँस्थित धुलिखेल–खावा सडक स्तरोन्नतिको काम गरिँदै । सडक डिभिजन कार्यालय भक्तपुरले दिउसोको समयमा शनिबार पाँच घण्टा र आइतबार चार घण्टा बाटो बन्द गरी कामलाई तिब्रता दिएको छ । तस्बिर : पेमा लामा/रासस
अरनिको राजमार्गको धुलिखेल–खावा सडक खण्ड कालोपत्रे तथा स्तरोन्नति गर्न आजदेखि १० दिनसम्म सवारी आवागमन पूर्ण रूपमा बन्द गर्ने निर्णय भएको छ ।
जिल्ला प्रशासन कार्यालय काभ्रेपलाञ्चोकमा बसेको सरोकारवालाहरूको बैठकले सो सडक खण्डमा आजदेखि यहि चैत्र ३० गतेसम्म सबै प्रकारका सवारी साधन सञ्चालनमा पूर्ण रोक लगाउने निर्णय गरेको हो । निर्णयअनुसार उक्त अवधिमा अत्यावश्यक सेवाबाहेक अन्य सवारी सञ्चालन गर्न पाइने छैन् ।
सडक डिभिजन कार्यालय भक्तपुरका अनुसार लामो समयदेखि जीर्ण अवस्थामा रहेको सडक खण्डमा एकैपटक पिच, सडक चौडाइ विस्तार, ढल तथा पानी निकास व्यवस्थापन लगायतका काम प्रभावकारी रूपमा सम्पन्न गर्न सवारी आवागमन बन्द गर्नुपरेको हो ।
काठमाडौ उपत्यकाबाट काभ्रे, सिन्धुपाल्चोक, दोलखालगायत जिल्लामा जाने सवारी साधन दैनिक रूपमा यही मार्ग प्रयोग गर्ने गर्दछन् तर, पछिल्लो समय सडक जीर्ण बन्दै जाँदा खाल्डाखुल्डी, धुलो, वर्षायाममा हिलो र पानी जम्ने समस्याले यात्रु तथा चालकहरूलाई सास्ती भोग्नुपरेको छ ।
