नवलपरासी पूर्व- वर्षाको कारण नवलपरासी पूर्वको दाउन्ने सडक खण्ड अवरुद्ध भएको छ । भारी वर्षाका कारण विनयी त्रिवेणी गाउँपालिका २ दाउन्ने बजार स्थित ६४ मोडमा सडक मर्मत भैरहेको स्थानमा सडक हिलो र चिप्लो हुदा राजमार्ग अवरुद्ध भएको हो । शुक्रवार देखि सवारी आवागमन प्रभावित भएको दाउन्ने खण्डमा आज विहान देखि परेको वर्षाका कारण राजमार्ग दुवैतर्फ अवरुद्ध भएको जिल्ला प्रहरी कार्यालय नवलपरासी पूर्वका प्रहरी उपरीक्षक युवराज खड्काले बताउनुभयो ।
रातको समयमा मालबहाक सवारी चलाउन रोक
नारायणघाट–बुटवल सडक खण्डमा रातिको समयमा ठूदा मालबहाक सवारी चलाउन रोक लगाइएको छ । नारायणघाट–बुटवल सडक योजनाले सूचना जारी गर्दै शुक्रबार देखि ८ गतेसम्म बेलुका ७ देखि बिहान ५ बजेसम्म दुम्कीवास–दाउन्ने–बर्दघाट खण्डमा ठूला मालवाहक सवारी रोक्ने जनाएको हो ।
कार्यालयका अनुसार ठूला मालवाहक सवारी साधनलाई बर्दघाटतर्फ त्रिवेणी चोक र दुम्किबास बजार क्षेत्रमा रोकिने व्यवस्था गरिएको छ । यात्रुवाहक तथा आकस्मिक सेवाका सवारी साधनलाई भने प्राथमिकताका आधारमा सञ्चालन गर्न दिइने जनाइएको छ । सडक विस्तार र मर्मतको काम चलिरहेको दाउन्ने सडक खण्डमा वर्षाका कारण सडक चिल्लो भई ठूला मालवाहक सवारी साधन चिप्लिने तथा अड्किने समस्या देखिएपछि यस्तो निर्णय गरिएको योजनाले जनाएको छ ।
