काठमाडौँ– नेपाली कांग्रेसका महामन्त्री प्रदीप पौडेलले बदलिएको कांग्रेसले देश विकासको नेतृत्व गर्ने बताउनुभएको छ ।
काठमाडौँ क्षेत्र नं ५ का मतदातासँग आज आयोजित भेटघाट कार्यक्रममा उहाँले कांग्रेस देशको विकासका लागि नेतृत्व लिन तयार रहेको बताउनुभयो । महामन्त्री पौडेलले नागरिकको अपेक्षाअनुसार नै पार्टी सुधार गरिएको बताउनुभयो ।
“नेपाली कांग्रेससँग नागरिकका धेरै गुनासा र अपेक्षा छन्, नागरिकका गुनासा सम्बोधन गर्न कांग्रेसलाई निर्वाचित गराउन आवश्यक छ”, उहाँले भन्नुभयो । आम निर्वाचन २०८२ का लागि देश विकासका भिजन समेटिएका घोषणा पत्र तयार गरिँदै गरेको उहाँको भनाइ थियो । सो घोषणापत्रले नागरिकका चाहना सम्बोधन गर्दै देश विकासको अबको मार्गचित्र तय गर्ने महामन्त्री पौडेलले बताउनुभयो ।
“नागरिकको अपेक्षाअनुसार देश बदल्ने यात्रामा प्रमुख १० प्राथमिकता तय गरेर हामी अघि बढ्दैछौँ, तपाईँहरु सबैको साथ र सहयोगको अपेक्षा गरेका छौँ”, उहाँले भन्नुभयो ।
