कुवेरराज कार्की, मुगु- मुगुको मुगुम कार्मारोङ गाउँपालिका–५, पुलु बजारमा ढुङ्गासहितको पहिरो खस्दा तीन वर्षीय बालकको मृत्यु भएको छ । शनिवार बिहान करिब ४ बजेतिर माथिबाट आएको पहिरो पेमा लामाको घरमा खस्दा त्यहाँ भाडामा होटल व्यवसाय सञ्चालन गर्दै बस्दै आएका छायाँनाथ रारा नगरपालिका–१३, तिर्प गाउका जगनाथ बडुवालको परिवार पहिरोमा परेको हो ।
घटनामा पहिरोले च्यापिएका तीन वर्षीय रमेश बडुवालको उद्धार गरी पुलु स्वास्थ्य चौकीमा उपचारका लागि पुर्याइए पनि उपचारकै क्रममा मृत्यु भएको जिल्ला प्रहरी कार्यालय मुगुले जनाएको छ। उनका बुवा जगनाथ बडुवाल र आमा सृजना बडुवाल सामान्य घाइते भएका छन् ।
प्रहरी चौकी डोल्फु पुलुबाट प्रहरी नायब निरीक्षक वीरबहादुर चन्दको नेतृत्वमा खटिएको प्रहरी टोली र स्थानीयवासीले उद्धार कार्य गरेका थिए । पहिरोले चार वटा घर पूर्ण रूपमा क्षतिग्रस्त भएको तथा थप आठ वटा घर जोखिममा परेपछि त्यहाँका बासिन्दालाई सुरक्षित स्थानमा सारिएको प्रहरीले जनाएको छ ।
विस्थापितमध्ये केहीलाई आफन्तको घरमा र केहीलाई पुलु स्वास्थ्य चौकीमा अस्थायी रूपमा राखिएको छ । जिल्ला प्रहरी कार्यालय मुगुका प्रहरी नायब उपरीक्षक रविराज थपलियाका अनुसार घटनाबारे थप विवरण संकलन भइरहेको छ ।
