कीर्तिपुर– कीर्तिपुर नगरपालिका वडा नम्बर १० स्थित सुन्दरीघाटको राधास्वामी सुकुमवासी होल्डिङ सेन्टर शुक्रबार राति अचानक डुबानमा पर्यो । शनिवार बिहानसम्म पनि यो क्षेत्र पूर्ण रूपमा जलमग्न बनिरहयो । राति सुतिरहेकै बेला अचानक बाढी पसेपछि यहाँका बासिन्दाले आफ्नो आवश्यक सामान समेत सुरक्षित स्थानमा सार्न पाएनन् ।
बाढीपछि सुरक्षाकर्मीको टोलीले सेन्टरमा रहेका १५४ जनामध्ये ५४ जनालाई तत्काल उद्धार गर्यो । उनीहरूलाई पहिले त्रिभुवन विश्वविद्यालय परिसरको स्मृति भवनमा र त्यसपछि भक्तपुरको खरिपाटीस्थित सुरक्षित स्थानमा स्थानान्तरण गरिएको छ ।
बाँकी रहेकामध्ये ६ जना आफ्ना आफन्तको गएका छन् भने प्रभावितहरूका लागि यहाँ खाना, खानेपानी र राहतको व्यवस्था भइरहेको गृह मन्त्रालयले जनाए पनि पीडितहरूको पीडा भने कम भएको छैन ।यता, विद्युत तालिम केन्द्र खरिपाटीमा भक्तपुरमा राखिएका २०७ जनामध्ये २५ जना अहिले पनि त्यहीँ बसिरहेका छन् । सरकारले प्रतिपरिवार दिएको २५ हजार रुपैयाँको राहत रकमले यो महँगीमा केही पनि नपुग्ने भन्दै सुकुम्बासीहरूले तीव्र गुनासो गरेका छन् ।
राधास्वामीबाट २० परिवार यहाँ आएको र यहाँका बाँकी प्रभावितहरूलाई इचङ्गुनारायणस्थित आवासमा पठाइएको प्रशासनले जनाएको छ ।
विस्थापितहरूको व्यवस्थापनका लागि आवश्यक कदम चालिरहेको भक्तपुरका प्रमुख जिल्ला अधिकारी बिनोद कुमार खड्काले बताउनु भयो ।
मनसुनको सुरुवातमै सुकुम्बासी बस्ती र होल्डिङ सेन्टरहरू डुबानमा पर्दा विपन्न नागरिकको जीवन थप कष्टकर बनेको अवस्था छ ।
