काठमाडौँ- विश्व फुटबल महासङ्घ (फिफा)ले अखिल नेपाल फुटबल सङ्घ (एन्फा) मा सरकारको हस्तक्षेप भएको भन्दै एन्फालाई अनिश्चित कालिन प्रतिबन्ध लगाएको छ ।
फिफाले हिजो जारी गरेको पत्रमा नेपाललाई निलम्बन गरिएको उल्लेख छ । निलम्बनसँगै नेपालले फिफाबाट पाउँदै आएको अनुदान रोक्ने जनाएको छ ।
नेपालले फुटबल विकासका लागि फिफाबाट वार्षिक एक अर्बभन्दा बढी रकम अनुदान सहयोग पाउँदै आएको थियो । फिफाको अनुसार निलम्बनमा परेसँगै नेपालले अन्तर्राष्ट्रिय फुटबल तथा युथ फुटबल खेल्न नपाउनुका साथै पदाधिकारीको विदेश भ्रमण समेत रोक्का हुनेछ ।
एन्फामा अध्यक्ष पंकजविक्रम नेम्वाङ नेतृत्वको चार वर्षे कार्यकाल यही असार ५ गते सकिएको थियो । तर, नेम्वाङ पक्षको एन्फा नेतृत्वले राष्ट्रिय खेलकुद परिषद् (राखेप) र अदालतको समेत अवज्ञा गर्दै अर्ली इलेक्सनको तयारी गरेपछि गत चैतमा राखेपले पनि एन्फालाई तीन महिना प्रतिबन्ध सहित कारबाही गरेर दुई महिनापछि तहगत निर्वाचन गर्नका लागि एन्फाको निलम्बन फुकुवा गरेको थियो ।
एन्फाले तहगत निर्वाचन गर्ने तयारी भने गरेको थिएन । यहीबिचमा विश्वकप फुटबल चलिरहेकै समयमा फिफाले एन्फालाई अनिश्चित कालीन निलम्बन गरेको हो ।।
