बारा- बाराको जीतपुरसिमरा उपमहानगरपालिका छातापिपरास्थित त्रिवेणी स्पेनिङ मिल्स उद्योगको कपास गोदाममा शुक्रबार आगलागी हुँदा १८० टन कपास र उद्योगमा रहेको धनमाल जलेर नष्ट भएको छ । आगो करिब दुई घण्टा पछि नियन्त्रणमा आएको हो ।
उद्योग परिसरभित्र रहेको कपास गोदाममा विद्युत सर्ट भई बिहान करिब १०ः४० बजे लागेको आगो १२ः३० बजे नियन्त्रणमा आएको ईलाका प्रहरी कार्यालय सिमराले जनाएको छ ।
आगलागीबाट गोदाममा भण्डारण गरिएको १८० टन कपास, मिक्सिङ ब्लेण्डर, मिक्सिङ ओपनर, कन्डेन्सर लगायतका मेसिन तथा गोदाम भवनमा ठूलो क्षति पुगेको छ ।
घटनामा कुनै मानवीय क्षति भएको छैन । बारा र पर्साका १२ वटा दमकल सहित नेपाल प्रहरी, शसस्त्र प्रहरी र नेपाली सेनासहित स्थानीयको सहयोगमा आगो नियन्त्रणमा आएको हो । क्षतिको पूर्ण विवरण आई नसकेको प्रहरीले जनाएको छ ।
आगो नियन्त्रणमा जिल्ला प्रहरी प्रमुख सहित सुरक्षा निकायको समेत उपस्थिति रहेको थियो ।।
