बारा- बिगत केहीदिन देखि तराईमधेशमा अत्यधिक गर्मी बढ्दै गएपछि बचेर काम गर्न मजदुर र कृषकहरूलाई बिज्ञहरुले सुझाब दिएका छन ।
गर्मीबाट दैनिक ज्याला मजदुरी गर्ने मजदुर र किसानहरु बढी मारमा परेका छन ।
बिगत तीनदिनदेखि तराईका अधिकांश भूभागमा अत्यधिक गर्मी महशुस भएको छ । तीन दिनमा दैनिक करिब एक डिग्री तापक्रम बढ्दो छ ।
तीन दिन अघि अधिकतम ३६ डिग्री तापक्रम भएकोमा आज झण्डै ४० डिग्री अधिकतम तापक्रम पुगेको छ ।
जल तथा मौसम पूर्वानुमान शाखाले सार्वजनिक गरेको विवरणमा अत्यधिक गर्मी हुने ‘तातो दिन’ को रुपमा उल्लेख गरिएको छ ।
उच्च तापक्रमका कारण खेतबारीमा काम गर्ने कृषकको स्वास्थ्यमा प्रतिकूल असर पारेको कृषक मजदुरहरुले बताएका छन ।
बिहान चाँडो वा साँझपख मात्र खेतबारीको काम गर्न, पर्याप्त पानी पिउनु तथा लामो समयसम्म घाममा नबस्न र घाममा जाँदा छाताको प्रयोग गर्न निजगढ नगरपालिकाका कृषि प्राविधिक रुपा पराजुलीको सुझाब छ ।
उच्च गर्मीको समयमा बढी पानी पिउने, सकेसम्म घाममा नहिड्न र गर्मीको समयमा सर्पको टोकाईको जोखिम उच्च रहेकोले बचेर काम गर्न प्राथमिक स्वास्थ्य केन्द्र निजगढका डा.दिपेन्द्र प्रसाद यादबले बताउनु भएको छ ।
गर्मी उच्च भएसगै लु लाग्ने सम्भावना भएकोले सावधानी अपनाएर खेती किसानी तथा जुनसुकै काम गर्न आबश्यक भएको डा. यादबको भनाइ छ ।।
