काठमाडौँ -प्रतिनिधि सभाको उपसभामुखमा श्रम संस्कृति पार्टीकी उम्मेदवार रुबीकुमारी ठाकुर निर्वाचित हुनु भएको छ ।
प्रतिनिधि सभामा उहाँलाई उपसभामुख बनाउने प्रस्ताव निर्णायार्थ पेश हुँदा प्रस्तावको पक्षमा २२९ मत र विपक्षमा जम्मा ५ मत परेको थियो । मतदानमा २५६ जना उपस्थिति हुनुभएको थियो ।
रुबी कुमारीलाई रास्वपा, नेपाली कांग्रेस, नेकपाले समर्थन गरेका हुन् । नेकपा (एमाले) भने उपसभामुखको निर्वाचनमा तटस्थ रह्यो ।
सदनमा भएको मत विभाजनको प्रक्रियामा २२ सांसद उपस्थित हुनुहुन्थ्यो । सभामुख डोलप्रसाद अर्यालले मतपरिणाम घोषणा गर्नुहुँदै सांसद ठाकुर उपसभामुख पदमा अत्यधिक बहुमतले निर्वाचित हुनुभएको जानकारी गराउनुभयो ।
उपसभामुख निर्वाचित रुबीका बुवाको नाम सोगराथ ठाकुर र आमाको नाम रेणु ठाकुर हो ।
उहाँका बुवा सोगराथ ईट्टाभट्टामा काम गर्दै आउनुभएको थियो भने हाल उहाँ वैदेशिक रोजगारीको शिलशिलामा साउदी अरेबियामा हुनुहुन्छ । उहाँकी आमा गृहिणी एवम् किसान हुनुहुन्छ ।
२५ वर्षीया उपसभामुख ठाकुरले २०७४ सालमा धनुषाको स्थानीय विद्यालयबाट माद्यमिक शिक्षा परीक्षा (एसइई) उत्तीर्ण गर्नुभएको हो । उहाँले धनुषाको बलरा पोलिटेक्निकबाट तीन वर्षे सिभिल इन्जिनियरिङमा डिप्लोमा गर्नुभएको छ ।
जेनजी आन्दोलन पश्चात् उहाँ श्रम संस्कृति पार्टीमा जोडिन पुग्नुभएको थियो । उहाँ श्रम संस्कृति पार्टीको समानुपातिक तर्फको सांसद हुनुहुन्छ ।
