काठमाडौं– – भारत सरकारले नेपाललाई आगामी निर्वाचन तयारीका लागि दिएको चुनाव सम्बन्धी सहयोगको पहिलो चरण आज गृह मन्त्रालयमा हस्तान्तरण गरिएको छ।
गृहमन्त्रालयमा एक कार्यक्रममका बीच भारतीय दुतावासका उप मिसन प्रमुख राकेश पाण्डेले गृह मन्त्री ओम प्रकाश आर्याललाई ६० भन्दा बढी डबल-क्याब पिकअप वाहन तथा अन्य आवश्यक आपूर्ति हस्तान्तरण गर्नु भएको हो ।
कार्यक्रममा गृह मन्त्री आर्यालले भारत सरकार र जनता प्रति आभार व्यक्त गर्दै दुई देशबीचको गहिरो सम्बन्धको प्रशंसा गर्नुभयो। भारत र नेपालको सम्बन्ध केवल राजनीतिक वा आर्थिक मात्र नभई, जनस्तरको मित्रता र विश्वासको प्रतीक पनि भएको उहाँको भनाइ थियो ।
नेपाल सरकारको अनुरोधअनुसार भारतले सन् २००८ देखि चुनाव सम्बन्धी सहयोग प्रदान गर्दै आएको छ। यसअन्तर्गत विभिन्न मन्त्रालय र निर्वाचन आयोगलाई करिब २,४०० वाहनहरु उपहारस्वरूप प्रदान भइसकेका छन्। आगामी चुनावका लागि भारतले करिब ६५० वाहनहरू सहयोग स्वरूप प्रदान गर्ने योजना बनाएको छ, जुन आगामी केही हप्तामा चरणबद्ध रूपमा हस्तान्तरण गरिनेछ।
