काठमाडौँ- नेपाली कांग्रेसका सभापति गगन कुमार थापाले अबको ५ वर्ष मधेसलाई केन्द्रमा राखेर काम गर्ने बताउनु भएको छ ।
मधेसको राजधानी जनकपुरधाममा ८ वटै जिल्लाका उम्मेदवार तथा जिल्ला अध्यक्षहरुसंगको भेटघाट कार्यक्रममा बोल्नु हुँदै थापाले नयाँ सोच र दृष्टिसहित कांग्रेस चुनावमा शामिल भएको बताउनु भयो ।
उहाँले नेपाली कांग्रेस मधेसलाई केन्द्रमा राखेर काम गर्न चाहन्छ, उहाँले भन्नुभयो ‘मधेशवादीलाई भोट दिन्छु भन्नेहरूलाई कांग्रेस नै सबैभन्दा पुरानो र असली मधेशवादी पार्टी हो भन्न सक्नुपर्छ ।’ उहाँले मधेसका बाँकी मुद्दाहरु कांग्रेसले पूरा गरेर देखाउने प्रतिवद्धता समेत व्यक्त गर्नु भयो ।
मधेशका मुद्दामा स्पष्ट र निर्भीक रूपमा बोल्ने नेतृत्व आवश्यक रहेको उल्लेख गर्दै थापाले चुनावमा राष्ट्रिय र स्थानीय दुवै मुद्दा लिएर जान पार्टीका नेता–कार्यकर्तालाई आग्रह गर्नुभयो । जेनजी युवाहरुको माग कुनै पार्टीले सम्बोधन गरेको छ भने त्यो पार्टी नेपाली कांग्रेस रहेको बताउनु भयो ।
उहाँले जेनजी युवाहरुको माग सम्बोधन गरेर विशेष महाधिवेशनबाट पार्टी नयाँ भएको बताउनु भयो । नेपाली कांग्रेस नेपालको सबैभन्दा नया पार्टी रहेको जेनजी युवाहरुलाई बुझाउन कार्यकर्ताहरुलाई समेत आग्रह गर्नुभयो । उहाँले नेपाली कांग्रेस नेपालको सबैभन्दा पुरानो र सबैभन्दा नयाँ दल पनि रहेको दावी गर्नुभयो ।
कांग्रेस अब रूपान्तरित भएको दाबी गर्दै थापाले पार्टी उत्तेजना फैलाउने नभई देश सम्हाल्ने शक्ति भएको बताउनु भयो । उहाँले देशमा भएको विध्वंश र विनाशलाई फेरी ट्रैकमा ल्याउने शक्ति नेपाली कांग्रेस संगै रहेको दावी गर्नु भयो ।
